വിവാഹ മോചനത്തിലൂടെ ലോകത്തിലെ ഏറ്റവും വലിയ ധനികയാവാനൊരുങ്ങി മാക്കെൻസി
25 വർഷത്തെ ദാമ്പത്യ ജീവിതത്തിന് ഒടുവില് വിവാഹ മോചിതരാവാനൊരുങ്ങി ആമസോണ് സ്ഥാപകനും സി.ഇ.ഒയുമായ ജെഫ് ബെസോസും ഭാര്യ മാക്കെൻസിയും. ട്വിറ്ററിൽ ഒരുമിച്ചുളള പ്രസ്താവനയിലൂടെയാണ് ഇരുവരും വിവാഹമോചനം വെളിപ്പെടുത്തിയത്.
‘’നീണ്ട കാലത്തെ സ്നേഹബന്ധത്തിനും ചെറിയ വേര്പിരിയലുകള്ക്കും ശേഷം ഞങ്ങള് വിവാഹമോചിതരാകാനും സുഹൃത്തുക്കളായി തുടരാനും തീരുമാനിച്ചിരിക്കുന്നു.’’- ട്വിറ്ററില് ജെഫ് ബെസോസും മാക്കെൻസിയും കുറിച്ചു.
ആമസോണ് സ്ഥാപകന് ജെഫ് ബെസോസും ഭാര്യ മാക്കെൻസിയും വിവാഹ മോചിതരാക്കുമ്പോള് മാക്കെന്സി ലോകത്തിലെ ഏറ്റവും ധനികയായ വനിതയായി മാറും. വിവാഹമോചിതരാക്കുമ്പോള് സ്വത്ത് തുല്യമായി വീതം വേക്കണമെന്ന് വ്യവസ്ഥ ചെയ്യുന്ന സ്ഥലമാണ് വാഷിങ്ടണ്. അതായത് വിവാഹമോചന നടപടിയിലൂടെ ബെസോസിന്റെ സ്വത്തിന്റെ പാതി ഭാര്യയായ മാക്കെൻസിക്ക് ലഭിക്കും.
നിലവില് 13700 കോടി ഡോളർ ആസ്തിയുണ്ട് ബെസോസിന്. സ്വത്ത് രണ്ടായി ഭാഗിച്ചാൽ ബെസോസിന് പകുതിയിലധികം ഡോളറിന്റെ ആസ്തി നഷ്ടമാവും. ആ സ്വത്ത് ലഭിക്കുന്നതോടെയാണ് മാക്കെൻസി ലോകത്തെ ഏറ്റവും വലിയ സമ്പന്നയായി മാറുന്നത്.
വാഷിങ്ടണ് പോസ്റ്റ്, ബഹിരാകാശ ഗവേഷണ സ്ഥാപകനായ ബ്ലൂ ഒറിജിൻ എന്നിവയിലുളള ജെഫ് ബെസോസിന്റെ ഓഹരികൾ ഉൾപ്പെടെ പങ്കുവെക്കപ്പെടുമെന്നാണ് റിപ്പോര്ട്ട്. പങ്കുവെക്കപ്പെടുന്ന സ്വത്തില് ആമസോൺ തന്നെയാണ് പ്രധാനപ്പെട്ടത്. ബെസോസിന്റെയും മാക്കെൻസിയുടെയും വരുമാനത്തിന്റെ മുഖ്യ ഉറവിടം ആമസോണായിരുന്നു. കമ്പനിയുടെ വളർച്ചയിൽ രണ്ടുപേരും തുല്യമായി സംഭാവന ചെയ്തിട്ടുണ്ടെന്നാണ് റിപ്പോർട്ടുകൾ പറയുന്നത്.
അതുകൊണ്ടുതന്നെ ആമസോണിൽ ബെസോസ് കൈവശം വെച്ചിരിക്കുന്ന ഓഹരിയിൽ പകുതി മാക്കെൻസിയുടെ കയ്യിലെത്തും. അതേസമയം ഇരുവരും വിവാഹമോചിതരാകുന്നതിന്റെ കാരണം എന്താന്നെന്ന് ഇതുവരെ വ്യക്തമാക്കിയിട്ടില്ല.