ലോകത്തിലെ ഏറ്റവും വലിയ സോഷ്യല്‍ മീഡിയ പ്ലാറ്റ്‌ഫോമാണ് ഫേസ്ബുക്ക്. ഇപ്പോള്‍ വളരെ വ്യത്യസ്തമായ ഒരു ആശയവുമായാണ് കമ്പനി രംഗത്തെത്തിയിരിക്കുന്നത്. എന്തെങ്കിലും കുറ്റകൃത്യത്തിന്റെ പേരില്‍ ജയില്‍ ശിക്ഷ കഴിഞ്ഞ് സമൂഹത്തിലേക്ക് തിരിച്ചെത്തുന്നവരെ ഉദ്ദേശിച്ചാണ് ഈ ആപ്പ് തയ്യാറാക്കുന്നത് എന്നാണ് റിപ്പോര്‍ട്ട്.
സമൂഹത്തിലെ പാര്‍ശ്വവത്കരിക്കപ്പെട്ട വിഭാഗങ്ങള്‍ക്ക് വേണ്ടിയുള്ള വിവിധ പദ്ധതികളുടെ ഭാഗമായാണ് ഫേസബുക്ക് ഇത്തരം ഒരു ആപ്പ് വികസിപ്പിച്ചെടുക്കുന്നത്. റീ എന്‍ട്രി ആപ്പ് എന്നാണ് ഇതിന്റെ പേര്. ഇത് സംബന്ധിച്ച ചില വിശദാംശങ്ങള്‍ കഴിഞ്ഞ ദിവസം ചില ഇന്‍സ്റ്റഗ്രാം ഉപയോക്താക്കള്‍ പങ്കുവച്ചിരുന്നു. ‘സാമൂഹിക പിന്തുണയോടെ ജയിലിന് ശേഷമുള്ള ജീവിതം കെട്ടിപ്പടുക്കുവാന്‍’ എന്നാണ് ഈ ആപ്പ് പ്രോമഷന് നല്‍കിയ തലക്കെട്ട്.
ഈ വിവരങ്ങള്‍ പങ്കുവച്ച് ആപ്പ് വിലയിരുത്തി അഭിപ്രായം പറയാനും പ്രത്യക്ഷപ്പെട്ട പോസ്റ്റുകള്‍ ആവശ്യപ്പെട്ടിരുന്നു എന്നാണ് റിപ്പോര്‍ട്ട്. ആധുനിക ലോകത്ത് ഇത്തരം പാര്‍ശ്വവത്കരിക്കപ്പെട്ട വിഭാഗങ്ങളെ സോഷ്യല്‍ മീഡിയ ആപ്പുകളിലേക്ക് ആകര്‍ഷിക്കാന്‍ കൂടിയാണ് ഈ രീതിയെന്നാണ് ഫേസ്ബുക്ക് വക്താവ് അറിയിക്കുന്നത്. വലിയ തോതിലുള്ള ആഭ്യന്തര ടെസ്റ്റിങ്ങ് നടത്തിയ ശേഷം നിയന്ത്രിതമായി പുറത്തുള്ളവര്‍ക്ക് ടെസ്റ്റിംഗിലാണ് ഈ ആപ്പ് എന്നാണ് ഫേസ്ബുക്ക് അറിയിക്കുന്നത്.
