മദ്യപിച്ച് വാഹനമോടിക്കുന്നവരെ കുടുക്കാന്‍ പുതിയ മാര്‍ഗവുമായി പൊലീസ്. പ്രത്യേകതരം ബ്രീത്ത് അനലൈസറുകള്‍ കൊണ്ടുവരാന്‍ ഒരുങ്ങുകയാണ് പൊലീസ്. ഒന്നു ഊതിയാല്‍ ഇനി വരിക ബീപ് ശബ്ദം മാത്രമല്ല, നിങ്ങളുടെ ചിത്രവും മുഴുവന്‍ വിവരങ്ങളും പുറത്ത് വരും. ക്യാമറയും പ്രിന്ററും കളര്‍ ടച്ച് സ്‌ക്രീനുമുള്ള ബ്രീത്ത് അനലൈസറുകള്‍ പരീക്ഷിക്കാനുള്ള ഒരുക്കത്തിലാണ് പൊലീസ് വകുപ്പ്.
നാല് മെഗാപിക്‌സല്‍ ശേഷിയുള്ള വൈഡ് ആംഗിള്‍ കാമറയുള്ള ബ്രീത്ത് അനലൈസറുകള്‍ക്കുള്ള ടെന്‍ഡര്‍ നടപടികള്‍ പുരോഗമിക്കുകയാണ്. പുതിയ ഉപകരണങ്ങള്‍ വരുന്നതോടെ രക്തത്തിലെ ആല്‍ക്കഹോളിന്റെ അളവ്, ടെസ്റ്റ് നടത്തിയ തിയതി, സമയം, സ്ഥലം, പേര്, ഡ്രൈവിങ് ലൈസന്‍സ് നമ്പര്‍, വാഹന രജിസ്‌ട്രേഷന്‍ നമ്പര്‍, ടെസ്റ്റ് നടത്തിയ ഓഫിസറുടെ പേര്, ഓഫിസറുടേയും ഡ്രൈവറുടേയും ഒപ്പ് എന്നിവയടങ്ങിയ രസീത് ലഭിക്കും.
രസീതിന്റെ അടിസ്ഥാനത്തില്‍ നേരിട്ടോ ഓണ്‍ലൈനായിട്ടോ 15 ദിവസത്തിനുള്ളില്‍ പിഴയടക്കാം. വാഹനമോടിച്ചയാളിന്റെ ചിത്രമടക്കമുള്ള വിവരങ്ങള്‍ ബ്രീത്ത് അനലൈസറിന്റെ മെമ്മറി കാര്‍ഡില്‍ സൂക്ഷിക്കാം. പിന്നീട് ഇത് കമ്പ്യൂട്ടറിലേക്ക് മാറ്റാം.
