പതിനൊന്നാം ശമ്പള കമ്മീഷന്റെ ശുപാര്ശ പ്രകാരം പെന്ഷന് പരിഷ്കരണത്തിന് 2019 ജൂലൈ 1 മുതല് പ്രാബല്യം നല്കാന് മന്ത്രിസഭ തീരുമാനിച്ചതായി മുഖ്യമന്ത്രി പിണറായി വിജയന് അറിയിച്ചു. ശമ്പള പരിഷ്കരണവും ഇതേ തീയതി മുതലാണ് നടപ്പാക്കുന്നത്. പരിഷ്കരിച്ച പെന്ഷന് 2021 ഏപ്രില് 1 മുതല് നല്കിത്തുടങ്ങാനാണ് തീരുമാനം.
പാര്ട് ടൈം പെന്ഷന്കാര്ക്കും പുതിയ നിയമം ബാധകമായിരിക്കും. നിലവിലെ രീതിയില് 30 വര്ഷത്തെ സേവനകാലത്തിന് മുഴുവന് പെന്ഷനും പത്തു വര്ഷത്തെ യോഗ്യതാ സേവനകാലത്തിനു ഏറ്റവും കുറഞ്ഞ പെന്ഷനും നല്കുന്നത് തുടരും. ഏറ്റവും കുറഞ്ഞ അടിസ്ഥാന പെന്ഷന് 11,500 രൂപയായും ഏറ്റവും കൂടിയ അടിസ്ഥാന പെന്ഷന് 83,400 രൂപയായും ഉയര്ത്തും.
ഏറ്റവും കുറഞ്ഞ അടിസ്ഥാന കുടുംബ പെന്ഷന് 11,500 രൂപയായും ഏറ്റവും കൂടിയ അടിസ്ഥാന കുടുംബ പെന്ഷന് (സാധരണ നിരക്ക്) 50,040 രൂപയായും വര്ധിപ്പിക്കും. പെന്ഷന്കാരുടെയും കുടുംബ പെന്ഷന്കാരുടെയും മെഡിക്കല് അലവന്സ് പ്രതിമാസം 500 രൂപയായി വര്ധിപ്പിക്കും. മെഡിക്കല് ഇന്ഷൂറന്സ് പദ്ധതി നടപ്പാക്കുന്നതുവരെ ഈ അലവന്സ് തുടരുമെന്ന് മുഖ്യമന്ത്രി പറഞ്ഞു.