മണ്‍സൂണ്‍കാല ട്രോളിങ് നാളെ അര്‍ധരാത്രി 12 മണിയോടെ നിലവില്‍ വരും. 52 ദിവസത്തേക്കാണ് നിരോധനം. ഇത് ജൂലൈ 31ന് അവസാനിക്കും. ഈ കാലയളവില്‍ യന്ത്രവല്‍കൃത ബോട്ടുകള്‍ ഒന്നും തന്നെ കടലില്‍ പോകുവാനോ മത്സ്യബന്ധനം നടത്താനോ പാടില്ല. നിരോധനം ലംഘിക്കുന്ന ബോട്ടുകള്‍ക്കെതിരെ കര്‍ശന നടപടി സ്വീകരിക്കുമെന്ന് അധികൃതര്‍ അറിയിച്ചു.
എന്നാല്‍, പരമ്പരാഗത വള്ളങ്ങള്‍ക്ക് മത്സ്യബന്ധനത്തിലേര്‍പ്പെടാന്‍ വിലക്കില്ല. അതേസമയം ഇരട്ട വള്ളങ്ങള്‍ (പെയര്‍) ഉപയോഗിച്ചുള്ള മീന്‍പിടിത്തം കര്‍ശനമായി നിരോധിച്ചിട്ടുണ്ട്. വലിയ വള്ളങ്ങള്‍ക്കൊപ്പം ഉപയോഗിക്കുന്ന കരിയര്‍ വള്ളങ്ങള്‍ക്കും നിയന്ത്രണമുണ്ട്. ട്രോളിങ് നിരോധനം കാരണം തൊഴില്‍രഹിതരായവര്‍ക്ക് സൗജന്യ റേഷന് പുറമെ ഇത്തവണ 1200 രൂപ നല്‍കാനും നടപടിയായി.
