സംസ്ഥാനത്ത് പ്രമേഹ ചികിത്സയ്ക്കുള്ള ഇന്‍സുലിന്‍ വിലക്കുറച്ച് വില്‍ക്കുന്നു. സപ്ലൈകോ വഴിയാണ് സര്‍ക്കാര്‍ ഇന്‍സുലിന്‍ ലഭ്യമാക്കുന്നത്. സപ്ലൈകോയുടെ മെഡിക്കല്‍ സ്റ്റോറുകള്‍ വഴി 25 ശതമാനം വിലക്കുറവില്‍ ഇന്‍സുലിന്‍ വില്‍ക്കുമെന്ന് ഭക്ഷ്യവിതരണ വകുപ്പ് മന്ത്രി ജിആര്‍ അനില്‍ അറിയിച്ചു.
സെപ്റ്റംബര്‍ ഒന്ന് മുതലാണ് വിലക്കുറച്ച് വില്‍പ്പന. കോവിഡ് പ്രതിസന്ധിയില്‍ മരുന്നിന് പണം കണ്ടെത്താന്‍ നിരവധിപ്പേര്‍ ബുദ്ധിമുട്ടുന്നുണ്ട്. ഈ പശ്ചാത്തലത്തിലാണ് വിലക്കുറച്ച് വില്‍ക്കാന്‍ സപ്ലൈകോ തീരുമാനിച്ചത്.
പ്രമേഹ ചികിത്സയ്ക്ക് സാധാരണക്കാര്‍ക്ക് വലിയ ചെലവ് വരുന്നുണ്ട്. രാജ്യത്ത് ഏറ്റവുമധികം പ്രമേഹരോഗികളുള്ള സംസ്ഥാനങ്ങളില്‍ ഒന്നാണ് കേരളം. ഇതില്‍ ദിവസവും ഇന്‍സുലിന്‍ മരുന്ന് ഉപയോഗിക്കുന്ന രോഗികളുമുണ്ട്. ഇത്തരക്കാര്‍ക്ക് ഇത് വലിയ ആശ്വാസമായിരിക്കും.
