ജീവനക്കാര്‍ക്ക് അനുവദിച്ചിരുന്ന കോവിഡ് സ്പെഷല്‍ ലീവില്‍ മാറ്റം വരുത്തി ഉത്തരവ്. സര്‍ക്കാര്‍, അര്‍ധസര്‍ക്കാര്‍, പൊതുമേഖല സ്ഥാപനങ്ങള്‍ എന്നിവയിലെയും സ്വകാര്യ സ്ഥാപനങ്ങളിലെയും ജീവനക്കാര്‍ക്ക് ഇത് ബാധകമാണ്
.നിലവില്‍ ഏഴ് ദിവസമാണ് കോവിഡ് വന്നവര്‍ക്ക് സ്പെഷല്‍ ലീവ് നല്‍കിയിരുന്നത്. ഇനി കോവിഡ് വരുന്ന ജീവനക്കാരില്‍ സൗകര്യമുള്ളവര്‍ക്ക് വര്‍ക്ക് ഫ്രം ഹോം അനുവദിക്കും. അവര്‍ക്ക് അവധിയില്ല. വര്‍ക്ക് ഫ്രം ഹോം സൗകര്യമില്ലാത്തവര്‍ക്ക് അഞ്ച് ദിവസം സ്പെഷല്‍ ലീവ് അനുവദിക്കും. അവധി ദിവസങ്ങള്‍ അടക്കമായിരിക്കും ഇത്.
അഞ്ച് ദിവസം കഴിഞ്ഞ് ആന്‍റിജന്‍ പരിശോധന നടത്തി നെഗറ്റിവ് ആയവര്‍ തുടര്‍ന്ന് ഓഫിസുകളിലെത്തണം. ശാരീരിക അകലവും കോവിഡ് പ്രോട്ടോകോളും പാലിച്ചാകണം ഇത്. അഞ്ച് ദിവസം കഴിഞ്ഞ് വീണ്ടും പോസിറ്റിവ് ആണെങ്കില്‍ രണ്ടുദിവസം കൂടി അനുവദനീയ അവധി എടുത്ത ശേഷം ഓഫിസില്‍ ഹാജരാകണം. ദുരന്ത നിവാരണ വകുപ്പാണ് പുതിയ ഉത്തവിറക്കിയത്.നേരത്തെ പ്രാഥമിക സമ്പര്‍ക്കപട്ടികയില്‍ വന്നവര്‍ക്ക് പോലും കോവിഡ് സ്പെഷല്‍ ലീവ് അനുവദിച്ചിരുന്നു.
