കേരളവും കോവിഡിനൊപ്പം ജീവിക്കുകയാണെങ്കിലും കോവിഡ് രോഗികളുടെ എണ്ണത്തിലും മരണത്തിലും ഇപ്പോഴും ഒട്ടും കുറവില്ല.കഴിഞ്ഞ 11 ദിവസത്തിനിടെ അതായത്, ആഗസ്റ്റ് ഇതുവരെ കേരളത്തില് റിപ്പോര്ട്ട് ചെയ്തത് 119 കോവിഡ് മരണങ്ങളാണ്.
12,897 പേര്ക്ക് രോഗം സ്ഥിരീകരിച്ചു.ഒരാഴ്ചത്തെ ശരാശരി രോഗ സ്ഥിരീകരണ നിരക്ക് 8.76 ആണ്. ഇതു ഗുരുതര സാഹചര്യമാണെന്നും പ്രതിരോധ മാര്ഗങ്ങള് കൂടുതല് ശക്തമാക്കണമെന്നും കേന്ദ്ര ആരോഗ്യമന്ത്രാലയം കേരളത്തിന് നിര്ദേശം നല്കിയിട്ടുണ്ട്.
കേരളം മുഴുവന് പനിച്ചും ചുമച്ചും മുന്നോട്ടുപോകുന്ന ഈ സാഹചര്യത്തില് പരിശോധിക്കുന്ന മിക്കവരും കോവിഡ് പോസിറ്റിവാണ്.എന്നാല്, ആനുപാതികമായി പരിശോധനകള് ഒരിടത്തും നടക്കുന്നില്ല. പനിയും ജലദോഷവും ചുമയുമായി എത്തുന്നവരെ കോവിഡ് പരിശോധനക്ക് ശിപാര്ശ ചെയ്യുന്നതും വിരളമായി. മരണങ്ങള് വര്ധിക്കാനും കോവിഡ് വ്യാപകമാകാനും ഇതു കാരണമെന്നാണ് ആരോഗ്യവിദഗ്ധര് ചൂണ്ടിക്കാട്ടുന്നത്. അതേസമയം, ഇതുവരെയുള്ള കോവിഡ് മരണങ്ങള് മുക്കാല് ലക്ഷത്തിലേക്ക് അടുക്കുകയാണ്.
മിക്ക വീടുകളിലും ഇപ്പോള് പനിബാധിതരുണ്ട്. രോഗം മാറിയാല് പോലും നീളുന്ന ചുമയും അസ്വസ്ഥതകളും കാരണം പ്രയാസപ്പെടുകയാണ് പലരും. എന്താണ് ഇപ്പോള് പകരുന്ന രോഗമെന്നത് ആരോഗ്യവകുപ്പും വ്യക്തത വരുത്തിയിട്ടില്ല. ഇപ്പോള് പകരുന്നത് കോവിഡ് ഒമിക്രോണ് വകഭേദം തന്നെയെന്നും അതിന് ജനിതകമാറ്റം വന്നിട്ടില്ലെന്നും ആരോഗ്യവകുപ്പ് പറയുന്നു. എന്നാല് എത്രപേര്ക്ക് കേരളത്തില് ഒമിക്രോണ് ബാധിച്ചു എന്നതിന് ആരോഗ്യവകുപ്പില് ഒരുകണക്കും ഇല്ല.