കോവിഡ് ബാധിതര്ക്കും ക്വാറന്റൈനിലുള്ളവര്ക്കും തദ്ദേശ തെരഞ്ഞെടുപ്പില് തപാല് വോട്ട് ചെയ്യാമെന്ന് തെരഞ്ഞെടുപ്പ് കമ്മീഷന് അറിയിച്ചു. മൂന്ന് ദിവസം മുന്പ് അപേക്ഷ നല്കണമെന്ന് മുഖ്യതെരഞ്ഞെടുപ്പ് കമ്മീഷണര് പറഞ്ഞു. കോവിഡ് പ്രോട്ടോകോള് കര്ശനമായി പാലിച്ചായിരിക്കും തെരഞ്ഞെടുപ്പ് നടത്തുക.
മാസ്ക്, ഗ്ലൗസ്, സാനിറ്റൈസര് ശാരീരിക അകലം എന്നിവ തെരഞ്ഞെടുപ്പില് നിര്ബന്ധമാണ്. ഡിസംബര് 31നു മുന്പ് ഭരണസമിതികള് അധികാരത്തിലേറുന്ന തരത്തിലാണ് പ്രവര്ത്തനങ്ങള് നടത്തുന്നത്. അന്തിമ വോട്ടര്പട്ടിക ഒക്ടോബര് ഒന്നിനു പ്രസിദ്ധീകരിച്ചിരുന്നു. 2,71,20,823 വോട്ടര്മാരാണുള്ളത്. നവംബര് 10ന് അഡീ. വോട്ടര് പട്ടിക പ്രസിദ്ധീകരിക്കും.
ഡിസംബര് 8, 10, 14 തീയതികളിലാണ് തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പ് നടക്കുക. കോവിഡ് പശ്ചാത്തലത്തില് 3 ഘട്ടമായാണ് തെരഞ്ഞെടുപ്പ് നടത്തുക. നവംബര് 12-ന് വിജ്ഞാപനം പുറപ്പെടുവിക്കും.
ഒന്നാം ഘട്ടം -ഡിസംബര് 8 (ചൊവ്വ) തിരുവനന്തപുരം, കൊല്ലം, പത്തനംതിട്ട, ആലപ്പുഴ. ഇടുക്കി,
രണ്ടാം ഘട്ടം ഡിസംബര് 10(വ്യാഴം) കോട്ടയം, എറണാകുളം, തൃശൂര്, പാലക്കാട്, വയനാട്.
മൂന്നാം ഘട്ടം ഡിസംബര് 14(തിങ്കള്) മലപ്പുറം. കോഴിക്കോട്, കണ്ണൂര്, കാസര്കോട്
ഡിസംബര് 16ന് വോട്ടെണ്ണല് നടക്കും. വോട്ടെടുപ്പ് സമയം രാവിലെ 7 മുതല് വൈകിട്ട് 6വരെ. രാവിലെ 8 മണിക്കു വോട്ടെണ്ണല് ആരംഭിക്കും. 1200 തദ്ദേശ സ്ഥാപനങ്ങളില് 1199 സ്ഥാപനങ്ങളിലേക്കാണ് തെരഞ്ഞെടുപ്പ്. 941 ഗ്രാമ പഞ്ചായത്തുകള്, 152 ബ്ലോക്ക് പഞ്ചായത്തുകള്, 14 ജില്ലാ പഞ്ചായത്തുകള്, 86 മുനിസിപ്പാലിറ്റികള്, 6 മുനിസിപ്പല് കോര്പറേഷനുകള് എന്നിവിടങ്ങളിലായി 21,865 വാര്ഡുകളിലേക്കാണ് ഈ വര്ഷം തെരഞ്ഞെടുപ്പ്.