കോഴിക്കോട് ജില്ലയില്‍ ഏതാനും പേര്‍ക്ക് ഷിഗെല്ല രോഗം സ്ഥിരീകരിച്ചതും രോഗ ബാധയെ തുടര്‍ന്ന് ഒരു മരണം ഉണ്ടായതും ആശങ്ക വര്‍ധിപ്പിക്കുന്ന കാര്യമാണ്. രോഗലക്ഷണങ്ങള്‍ ഉള്ള നിരവധി കേസുകളും ഇതിനകം ജില്ലയില്‍ റിപ്പോര്‍ട്ട് ചെയ്തിട്ടുണ്ട്. എന്നാല്‍, വ്യക്തി ശുചിത്വം പാലിച്ചാല്‍ ആശങ്ക വേണ്ടെന്ന് ആരോഗ്യ വകുപ്പ് അറിയിച്ചു.
ഒരു തരം അണുബാധയാണ് ഷിഗെല്ല. ഒരാളുടെ ദഹനവ്യവസ്ഥയുടെ പ്രവര്‍ത്തനത്തെയാണ് ഷിഗെല്ല രോഗം ബാധിക്കുന്നത്. ഷിഗെലോസിസ് അഥവാ ഷിഗെല്ല എന്ന ശാസ്ത്രീയ നാമത്തില്‍ അറിയപ്പെടുത്ത ഒരു കൂട്ടം ബാക്ടീരിയകളാണ് ഈ രോഗമുണ്ടാകുന്നത്. പ്രധാനമായും മലിന ജലത്തിലൂടെയും മലവിസര്‍ജ്യവുമായുള്ള സമ്പര്‍ക്കത്തിലൂടെയും, ചില സാഹചര്യങ്ങളില്‍ ഭക്ഷണത്തിലൂടെയുമാണ് ഷിഗെല്ല ബാക്ടീരിയകള്‍ പടരുന്നത്.
ലക്ഷണങ്ങള്‍
വയറിളക്കമാണ് ഷിഗെലോസിസ് രോഗത്തിന്റെ പ്രാഥമിക ലക്ഷണം. പനി, വയറുവേദന, അടിക്കടി, മലശങ്കയുണ്ടാകുക തുടങ്ങിയവയെല്ലാം പ്രധാന ലക്ഷണങ്ങളാണ്. ഷിഗെല്ല ബാധിച്ചവരുടെ മലത്തില്‍ രക്തക്കറ ഉണ്ടാകാനുള്ള സാധ്യതയുണ്ട്. പനി വരാനും സാധ്യതയുണ്ട്.
മുന്‍കരുതലുകള്‍
- മികച്ച വ്യക്തിഗത ശുചിത്വം പാലിക്കുക. ബാത്ത്‌റൂം ഉപയോഗിക്കുന്നതിന് മുമ്പും ശേഷവും കൈകള്‍ നന്നായി സോപ്പ് ഉപയോഗിച്ച് കഴുകുക.
- ചെറിയ കുട്ടികളുടെ ഡയപ്പര്‍ മാറ്റുമ്പോഴും ശ്രദ്ധ വേണം. ബാക്ടീരിയ പടരാതിരിക്കാനായി വൃത്തിഹീനമായ ഡയപ്പറുകള്‍ അടച്ച ബാഗിലോ ട്രാഷ് ബിന്നിലോ ശ്രദ്ധയോടെ ഉപേക്ഷിക്കുക.
- കൈ കഴുകുമ്പോഴെല്ലാം സോപ്പും ചൂടുവെള്ളവും ഉപയോഗിക്കുക. ഉപയോഗത്തിന് മുമ്പും ശേഷവും ആന്റി ബാക്ടീരിയല്‍ വൈപ്പുകള്‍ ഉപയോഗിക്കുക.
- വയറിളക്കത്തിന്റെ ലക്ഷണങ്ങള്‍ ബാധിച്ച ആളുകളുമായി അടുത്ത് ഇടപഴകുന്നത് ഒഴിവാക്കുക. നിങ്ങളുടെ ലക്ഷണങ്ങള്‍ ഷിഗെല്ലയുടേതല്ല എന്ന് ഉറപ്പാക്കാനായി മല പരിശോധന നടത്താം.
- കക്കൂസും കുളിമുറിയും അണുനശീകരണം നടത്തുക. അതോടൊപ്പം തുറസായ സ്ഥലങ്ങളില്‍ മലമൂത്രവിസര്‍ജനം ചെയ്യാതിരിക്കുക.
