കോവിഡ് രോഗവ്യാപനം വര്‍ദ്ധിക്കാതിരിക്കാന്‍ ഇന്ത്യക്ക് മുന്നറിയിപ്പ് നല്‍കി കനേഡിയന്‍ ഗവേഷകര്‍. വായൂ സഞ്ചാരമില്ലാത്ത അടച്ചിട്ട മുറികളാണ് ഇനി കോവിഡ് വ്യാപനത്തിന്റെ പ്രധാന ഘടകമായി മാറുകയെന്നാണ് ഗവേഷകരുടെ കണ്ടെത്തല്‍.
കാനഡ പോലുള്ള രാജ്യങ്ങളില്‍ ശൈത്യകാലത്ത് കോവിഡ് വ്യാപനം ഉയര്‍ന്നതിന് സമാനമായ ഒരു പ്രതിഭാസം വേനല്‍ക്കാലത്തെ ചൂടിന്റെ പശ്ചാത്തലത്തില്‍ ഇന്ത്യയില്‍ സംഭവിക്കുമെന്നാണ് വിദഗ്ധരുടെ നിരീക്ഷണം. അതുകൊണ്ട്, മെയ്, ജൂണ്‍ മാസങ്ങളില്‍ താപനില ഉയരുമ്പോള്‍ കൂടുതല്‍ ജാഗ്രത പാലിക്കണമെന്ന് മുന്നറിയിപ്പില്‍ പറയുന്നു.
ടൊറന്റോ ആസ്ഥാനമായുള്ള യൂണിറ്റി ഹെല്‍ത്ത് സെന്റ് മൈക്കല്‍ ഹോസ്പിറ്റലിലെ എപ്പിഡെമിയോളജിസ്റ്റും സെന്റര്‍ ഫോര്‍ ഗ്ലോബല്‍ ഹെല്‍ത്ത് റിസര്‍ച്ചിന്റെ എക്‌സിക്യൂട്ടീവ് ഡയറക്ടറുമായ പ്രഭാത് ജാ ആണ് മുന്നറിയിപ്പ് നല്‍കിയത്.
18 വലിയ ഇന്ത്യന്‍ നഗരങ്ങളില്‍ നിന്നുള്ള കണക്കനുസരിച്ച് 50-60 ശതമാനം മുതിര്‍ന്ന് ആളുകള്‍ക്ക് ഇതിനകം രോഗം ബാധിച്ചതാണ്. ഇന്ത്യയില്‍ നിലവില്‍ കോവിഡ് കേസുകള്‍ കുറയാനുള്ള കാരണമായി ചൂണ്ടിക്കാട്ടുന്നതും ഇതുതന്നെയാണ്. അതേസമയം വീണ്ടും ഇവിടെ കേസുകള്‍ വര്‍ദ്ധിക്കുന്നത് പ്രത്യേകിച്ച് മുംബൈയിലെ നിലവിലെ സ്ഥിതി ആശങ്കപ്പെടുത്തുന്നതാണെന്ന് ഗവേഷണകര്‍ പറയുന്നു.
