ഇന്നുമുതല് സംസ്ഥാനത്ത് ലോക്ഡൗണിന് ചെറിയ ഇളവുകളുണ്ട്. ഇതോടനുബന്ധിച്ച് കെഎസ്ആര്ടിസി ദീര്ഘദൂര സര്വീസുകള് ഇന്ന് മുതല് പുനരാരംഭിക്കുകയാണ്. പരിമിതമായ ദീര്ഘ ദൂര സര്വീസുകളാവും നടത്തുകയെന്ന് ഗതാഗത മന്ത്രി ആന്റെണി രാജു അറിയിച്ചു.
കോവിഡ് രണ്ടാം വ്യാപനം തുടങ്ങിയതോടെ കഴിഞ്ഞ മേയ് എട്ടിന് ആണ് കെഎസ്ആര്ടിസി സര്വ്വീസുകള് അവസാനിപ്പിച്ചത്. ‘എന്റെ കെഎസ്ആര്ടിസി’ മൊബൈല് ആപിലും www.ker alartc.com എന്ന വെബ്സൈറ്റിലും സര്വീസുകളെക്കുറിച്ചുള്ള വിവരങ്ങള് ലഭിക്കും. ഓണ്ലൈനിലൂടെ ടിക്കറ്റുകള് റിസര്വ് ചെയ്യാം. യാത്രക്കാരുടെ ലഭ്യതയ്ക്ക് അനുസരിച്ചായിരിക്കും സര്വ്വീസുകള്.
രോഗവ്യാപനം കുറഞ്ഞതോടെയാണ് കെഎസ്ആര്ടിസി സര്വ്വീസുകള് പുനരാരംഭിക്കാന് ചീഫ് സെക്രട്ടറി അനുമതി നല്കിയത്. നാഷണല് ഹൈവേ, എംസി റോഡ് , മറ്റ് പ്രധാന സ്റ്റേറ്റ് ഹൈവേകള് എന്നിവിടങ്ങളിലൂടെയാണ് സര്വീസുകള് നടത്തുന്നത്. കര്ശന നിയന്ത്രണമുള്ള 12, 13 തീയതികളില് ദീര്ഘദൂര സര്വീസുകള് ഉണ്ടാകില്ല.
യാത്രക്കാര് ആവശ്യമുള്ള രേഖകള് കരുതണമെന്ന് നിര്ദേശമുണ്ട്. കൂടാതെ, ബസുകളില് ഇരുന്നു മാത്രമേ യാത്ര അനുവദിക്കൂ. ലോക്ഡൗണ് പിന്വലിക്കുന്ന 17 ന് ദീര്ഘദൂര സര്വീസുകള് പൂര്ണമായും പുനരാരംഭിക്കുമെന്നും ഗതാഗത മന്ത്രി അറിയിച്ചു.