സംസ്ഥാനത്തെ സ്റ്റേജ്, കോണ്‍ട്രാക്ട് കാര്യേജുകളുടെ ഈ സാമ്പത്തിക വര്‍ഷത്തിലെ ജൂലൈ ഒന്നിന് ആരംഭിച്ച രണ്ടാം ക്വാര്‍ട്ടറിലെയും വാഹന നികുതി അടയ്‌ക്കേണ്ട അവസാന തീയതി ഡിസംബര്‍ 31 വരെ നീട്ടി. ഒക്ടോബര്‍ ഒന്നിന് ആരംഭിച്ച മൂന്നാം ക്വാര്‍ട്ടറിലെയും വാഹന നികുതിയുടെതും ഇതില്‍ ഉള്‍പ്പെട്ടിട്ടുണ്ട്. പുതുക്കിയ അറിയിപ്പ് ഗതാഗതമന്ത്രി ആന്റണി രാജുവാണ് പുറത്തുവിട്ടത്.
ആദ്യ ക്വാര്‍ട്ടറിലെ (ഏപ്രില്‍-ജൂണ്‍) നികുതി പൂര്‍ണമായും ഒഴിവാക്കിയിരുന്നു. കോവിഡ് മഹാമാരി മൂലം വാഹന ഗതാഗത രംഗത്തുള്ളവരുടെ സാമ്പത്തിക ബുദ്ധിമുട്ടും തൊഴില്‍ രാഹിത്യവും നിലനില്‍ക്കുന്നത് പരിഗണിച്ചാണ് ഇപ്പോഴത്തെ നടപടിയെന്ന് മന്ത്രി അറിയിച്ചു.
കോവിഡ് പശ്ചാത്തലത്തില്‍ വിദ്യാഭ്യാസ സ്ഥാപനങ്ങളിലെ വാഹനങ്ങളുടെ ഇതു വരെയുള്ള നികുതി ഒഴിവാക്കാനുള്ള നിര്‍ദ്ദേശം മുഖ്യമന്ത്രി അംഗീകരിച്ചുവെന്ന് മന്ത്രി അറിയിച്ചു. 2020 ഒക്ടോബര്‍ മുതല്‍ 2021 സെപ്റ്റംബര്‍ വരെയുള്ള കാലയളവിലെ നികുതിയാണ് ഒഴിവാക്കുന്നത്.
