മറ്റ് സംസ്ഥാനങ്ങൾക്കുമൊപ്പം കേരളത്തിലും ഡെങ്കിപ്പനി കേസുകൾ കാര്യമായി റിപ്പോർട്ട് ചെയ്യപ്പെടുന്ന സാഹചര്യമാണ് നിലവിലുള്ളത്. കൊവിഡ് 19 പ്രതിസന്ധികൾക്കിടയിൽ കൊതുക് നിവാരണ പരിപാടികൾ അടക്കമുള്ള ശുചിത്വപ്രവർത്തനങ്ങൾ മുടങ്ങിയതും മഴ നീണ്ടുനിന്നതുമാണ് ഡെങ്കു കേസുകൾ വർധിക്കാനിടയാക്കിയത്.
കേസുകൾ വർധിക്കുന്ന സാഹചര്യത്തിൽ ഈ രോഗത്തെ കുറിച്ചും ഇതുണ്ടാക്കുന്ന ആരോഗ്യപ്രശ്‌നങ്ങളെ കുറിച്ചും കൃത്യമായി അറിഞ്ഞിരിക്കേണ്ടതുണ്ട്.
ഡെങ്കിപ്പനി കേസുകൾ കാര്യമായി വർധിക്കുന്നുണ്ടെങ്കിലും മരണനിരക്ക് ഉയരാത്തത് വലിയ ആശ്വാസമാണ് കേരളം അടക്കമുള്ള സംസ്ഥാനങ്ങൾക്ക് നൽകുന്നത്. എന്നാൽ ഡെങ്കിപ്പനി ഒരര്‍ത്ഥത്തില്‍ ജീവന് ഭീഷണി ആണ്.
പല സന്ദർഭങ്ങളിലും ഡെങ്കിപ്പനി അപകടകാരിയായി മാറാറുണ്ട്. പ്രത്യേകിച്ച് രോഗപ്രതിരോധ ശേഷി കുറഞ്ഞവരിലും നേരത്തേ മറ്റ് രോഗങ്ങൾ ഉള്ളവരിലുമാണ് ഇത് തീവ്രമായി മാറുന്നത്. പ്ലേറ്റ്‌ലെറ്റ് രക്താണുക്കളുടെ എണ്ണം ഗണ്യമായി കുറയുന്നതും ഡെങ്കിപ്പനിയുടെ സവിശേഷതയാണ്. ഇതും നിയന്ത്രണത്തിൽ നിന്നില്ലെങ്കിൽ അപകടം തന്നെ.
കൊവിഡിന്റെ കാര്യത്തിലെന്ന പോലെ തന്നെ, ഡെങ്കിപ്പനിയിലും രോഗാവസ്ഥയിൽ കാണപ്പെടുന്ന ചില ലക്ഷണങ്ങൾ രോഗശേഷവും നീണ്ടുനിൽക്കാറുണ്ട്. കടുത്ത ക്ഷീണമാണ് ഇത്തരത്തിൽ ഏറെ നാൾ നീണ്ടുനിൽക്കുന്നൊരു ആരോഗ്യപ്രശ്‌നം.
അതിതീവ്രമായ പനിയാണ് ഡെങ്കിപ്പനിയുടെ പ്രധാന ലക്ഷണം. 102-104 ഡിഗ്രിഫാരൻഹീറ്റ് വരെ ഡെങ്കിപ്പനിയിൽ രേഖപ്പെടുത്താറുണ്ട്. പനിക്കൊപ്പം തന്നെ അസഹ്യമായ ക്ഷീണം, സന്ധിവേദന, പേശിവേദന, തലവേദന, കണ്ണുവേദന എന്നിങ്ങനെയുള്ള പ്രശ്‌നങ്ങളും അനുഭവപ്പെടാം. ഇതിൽ ക്ഷീണവും ശരീരവേദനയും രോഗം മാറിയ ശേഷവും ചിലരിൽ ഏറെ നാളത്തേക്ക് കാണാം.
ഒരു വിഭാഗം പേരിൽ ഡെങ്കിപ്പനി വന്നുപോയ ശേഷം മുടികൊഴിച്ചിൽ ഉണ്ടാകാം. 1-2 മാസം വരെ ഇത് തുടരാം. ഈ സമയങ്ങളിൽ കാര്യമായ രീതിയിൽ തന്നെ മുടികൊഴിച്ചിൽ ഉണ്ടാകാനുള്ള സാധ്യതകളുണ്ട്.
ചിലരിൽ പ്രത്യേക ഭാഗങ്ങളിലായാണ് മുടി കൊഴിച്ചിൽ ഉണ്ടാവുക. ഇത് അണുബാധയുടെ തീക്ഷണത മൂലവും, മരുന്നുകളുടെ റിയാക്ഷനായും, ഹോർമോൺ വ്യതിയാനത്തെ തുടർന്നും, ഡയറ്റിലെ പ്രശ്‌നങ്ങൾ മൂലവുമെല്ലാമാണ് സംഭവിക്കുന്നത്.
അണുബാധ സമയത്ത് വിശപ്പ് കുറയുന്നതും ഭക്ഷണം ഒഴിവാക്കുന്നതും വണ്ണം കുറയുന്നതിനും പോഷകാഹാരക്കുറവിനും കാരണമായി വരാം. ഇതും മുടി കൊഴിച്ചിൽ വർധിപ്പിക്കാം.
ഡെങ്കിപ്പനിക്ക് ശേഷം ശരീരത്തിന് മതിയായ വിശ്രമം നൽകിക്കൊണ്ടാണ് ആരോഗ്യത്തെ വീണ്ടെടുക്കാൻ ശ്രമിക്കേണ്ടത്. ധാരാളം വെള്ളം കുടിക്കുക. ജ്യൂസുകൾ, ഇളനീർ പോലുള്ള പാനീയങ്ങൾ കഴിക്കുക. ആരോഗ്യകരമായ ഡയറ്റ് പാലിക്കുക. ദഹനത്തിന് സമയമെടുക്കുന്ന തരം ഭക്ഷണങ്ങൾ പരമാവധി കുറയ്ക്കുക. ‘അയേൺ’, ‘ആന്റി ഓക്‌സിഡന്റുകൾ’, ‘വൈറ്രമിൻ ബി 12’ എന്നിവ അടങ്ങിയ ഭക്ഷണം നിർബന്ധമായും ഡയറ്റിലുൾപ്പെടുത്തുക.
ഡെങ്കിപ്പനി മാറിയ ശേഷം ഉടൻ തന്നെ കഠിനമായ വർക്കൗട്ടുകളിലോ ജോലിയിലോ സജീവമാകരുത്. ഇത് ശരീരത്തിന് ദോഷം ചെയ്‌തേക്കാം. ചെറിയ വ്യായാമങ്ങൾ ചെയ്യാം. പതിയെ ആരോഗ്യം വീണ്ടെടുക്കുന്നതിന് അനുസരിച്ച് പഴയ ജീവിതരീതിയിലേക്ക് മാറാം. ഡോക്ടർ നിർദേശിച്ച സപ്ലിമെന്റുകളോ മരുന്നുകളോ ഉണ്ടെങ്കിൽ അത് കൃത്യമായി കഴിക്കുക.
