മുഖ്യ എതിരാളിയായ ആമസോൺ പ്രൈം നിരക്കുകൾ അൻപതു ശതമാനത്തോളം വർധിപ്പിച്ചതിനു പിന്നാലെ പ്രമുഖ വിഡിയോ സ്ട്രീമിങ് പ്ലാറ്റ്‌ഫോം നെറ്റ്ഫ്ളിക്സ് ഇന്ത്യയിലെ നിരക്കുകൾ കുറച്ചു. മൊബൈൽ പ്ലാൻ 199ൽനിന്ന് 149 ആയും ടെലിവിഷനിൽ ഉപയോഗിക്കാവുന്ന ബേസിക് പ്ലാൻ 499ൽനിന്ന് 199 ആയുമാണ് കുറച്ചത്.
പ്രതിമാസം 149 രൂപയ്ക്ക് ഉപയോഗിക്കാവുന്ന മൊബൈൽ പ്ലാനിൽ മെച്ചപ്പെട്ട വിഡിയോ ക്വാളിറ്റിയിൽ മൊബൈൽ ഫോണിലും ടാബിലും സിനിമകളും മറ്റു പരിപാടികളും കാണാം. 199 രൂപയ്ക്ക് ഉപയോഗിക്കാവുന്ന ബേസിക് പ്ലാനിൽ ഫോൺ, ടാബ്, കംപ്യൂട്ടർ, ടിവി എന്നിവയിൽ വിഡിയോ കാണാനാവും.
മികച്ച വിഡിയോ ക്വാളിറ്റിയിൽ ചിത്രങ്ങൾ കാണാവുന്ന സ്റ്റാൻഡേർഡ് പ്ലാനിന് പ്രതിമാസം 499 രൂപയാണ് നൽകേണ്ടത്. ഫോൺ, ടാബ്, കംപ്യൂട്ടർ, ടിവി എന്നിവയിൽ ഉപയോഗിക്കാം. നേരത്തെ ഈ പ്ലാനിന് 649 രൂപയായിരുന്നു നൽകേണ്ടിയിരുന്നത്.
ഫോർ കെ, എച്ച്ഡി ക്വാളിറ്റിയിൽ ചിത്രങ്ങൾ കാണാവുന്ന പ്രീമിയം പ്ലാനിന് 649 രൂപയാണ് ചാർജ്. നേരത്തെ ഇത് 799 രൂപയായിരുന്നു.
