ഗര്‍ഭകാലത്തേത് പോലെ തന്നെ മുലയൂട്ടുന്ന സമയത്തും ഭക്ഷണകാര്യത്തില്‍ ശ്രദ്ധ പുലര്‍ത്തണം. ആറ് മാസം വരെ കുഞ്ഞിന് മുലപ്പാല്‍ മാത്രമേ നല്‍കാന്‍ പാടൂള്ളൂ. അത് കൊണ്ട് തന്നെ പോഷകഗുണങ്ങളുള്ള ഭക്ഷണങ്ങളായിരിക്കണം മൂലയൂട്ടുന്ന അമ്മമാര്‍ കഴിക്കേണ്ടത്. മുലപ്പാല്‍ വര്‍ധിപ്പിക്കാന്‍ സഹായിക്കുന്ന ചില പ്രധാനപ്പെട്ട ഭക്ഷണങ്ങള്‍ ഏതൊക്കെയാണെന്ന് നോക്കാം.
പെരുംജീരകം (വലിയ ജീരകം) മുലപ്പാല്‍ വര്‍ദ്ധിപ്പിക്കാന്‍ സഹായിക്കുന്ന ഭക്ഷണമാണ്. പെരുംജീരകത്തിന്റെ പതിവായ ഉപയോഗം ദഹനം സുഗമമാക്കുകയും പ്രസവശേഷം ഉണ്ടാകാവുന്ന മലബന്ധം അകറ്റാനും സഹായിക്കും. പെരുംജീരകം ഇട്ട് തിളപ്പിച്ച വെള്ളം കുടിക്കുന്നത് മുലപ്പാല്‍ വര്‍ദ്ധിപ്പിക്കുന്നതിന് സഹായിക്കും.
കാല്‍സ്യം, കോപ്പര്‍, ഇവ ധാരാളമായി അടങ്ങിയ സാധനമാണ് എള്ള്. അമ്മയ്ക്കും കുഞ്ഞിനും ആരോഗ്യമേകുന്ന നിരവധി പോഷകങ്ങള്‍ എള്ളില്‍ അടങ്ങിയിട്ടുണ്ട്. എള്ള് മുലപ്പാല്‍ കൂടാന്‍ മികച്ചൊരു ഭക്ഷണമാണ്.
പ്രസവാനന്തരം മുലപ്പാലിന്റെ ഉല്‍പ്പാദനം കൂട്ടാന്‍ ഉലുവ സഹായിക്കും. തലേന്ന് ഒരു ഗ്ലാസ് വെള്ളത്തില്‍ ഉലുവ കുതിര്‍ക്കുക. പിറ്റേന്ന് രാവിലെ ഈ വെള്ളം കുടിക്കുക. ഉലുവയിട്ടു തിളപ്പിച്ച വെള്ളം കുടിക്കുന്നത് മൊത്തത്തിലുള്ള ആരോഗ്യത്തിനും നല്ലതാണ്.
മധുരക്കിഴങ്ങ്, ചേന, കാരറ്റ്, ബീറ്റ്‌റൂട്ട് ഇവയില്‍ ബീറ്റാ കരോട്ടിന്‍ ധാരാളമായി അടങ്ങിയിട്ടുണ്ട്. ഇവ മുലപ്പാല്‍ വര്‍ധിപ്പിക്കാന്‍ സഹായിക്കുന്നതോടൊപ്പം കരളിന്റെ ആരോഗ്യത്തിനും നല്ലതാണ്.
മുലപ്പാല്‍ വര്‍ദ്ധിപ്പിക്കാന്‍ സഹായിക്കുന്ന മറ്റൊരു ഭക്ഷണമാണ് ഓട്സ്. ഇതിലെ ഡയറ്ററി ബീറ്റാ ഗ്ലൂക്കേന്‍ ആണ് ഈ പ്രത്യേക ഗുണം നല്‍കുന്നത്. ഓട്സ് സാധാരണ പോലെ പാചകം ചെയ്തു കഴിക്കുക.
