ഷഓമിയുടെ റെഡ്മി 10 എ, റെഡ്മി 10 സി എന്നിവ ഇന്ത്യയില്‍ ഉടന്‍ അവതരിപ്പിച്ചേക്കുമെന്ന് റിപ്പോര്‍ട്ട്. കഴിഞ്ഞ വര്‍ഷം ഷഓമി എന്‍ട്രി ലെവല്‍ സ്മാര്‍ട് ഫോണുകളൊന്നും അവതരിപ്പിച്ചിരുന്നില്ല. മിഡ് റേഞ്ച്, പ്രീമിയം മോഡലുകളിലാണ് ശ്രദ്ധ കേന്ദ്രീകരിച്ചത്. എന്നാല്‍ ഇപ്പോള്‍ റെഡ്മി എ, റെഡ്മി സി സീരീസിനു കീഴില്‍ പുതിയ ഹാന്‍ഡ്‌സെറ്റുകള്‍ അവതരിപ്പിച്ചേക്കുമെന്നാണ് പ്രതീക്ഷിക്കുന്നത്.
ഷഓമിയുടെ റിപ്പോര്‍ട്ട് അനുസരിച്ച്, ഈ മോഡലുകള്‍ ഇന്ത്യ, ചൈന, മറ്റ് ആഗോള വിപണികളില്‍ അവതരിപ്പിക്കാനും കമ്പനിക്ക് പദ്ധതിയുണ്ട്. റെഡ്മി 10എ-യ്ക്ക് ‘ഇടി’, ‘ലൈറ്റ്’ എന്നിങ്ങനെയാണ് കോഡ് നാമം നല്‍കിയിരിക്കുന്നത്, അതേസമയം റെഡ്മി 10സി-ക്ക് ‘മഞ്ഞ്,’ ‘മഴ’, ‘കാറ്റ്’ എന്നിങ്ങനെ മൂന്ന് കോഡ്നാമങ്ങളുണ്ട്. മീഡിയടെക് പ്രോസസര്‍ ആയിരിക്കും ഉപയോഗിക്കുക. പിന്നില്‍ മൂന്ന് ക്യാമറകളാണ് പ്രതീക്ഷിക്കുന്നത്.
50 മെഗാപിക്‌സലിന്റെ സാംസങ് ISOCELL S5KJN1 സെന്‍സര്‍ അല്ലെങ്കില്‍ ഒമ്‌നിവിഷന്‍ OV50C സെന്‍സര്‍ എന്നിവ ഉള്‍പ്പെടാം. ഇത് 8 മെഗാപിക്‌സല്‍ സെക്കന്‍ഡറി അള്‍ട്രാവൈഡ് സെന്‍സറും 2 മെഗാപിക്‌സല്‍ OV02B1B അല്ലെങ്കില്‍ SC201CS മാക്രോ ക്യാമറയുമായി ജോടിയാക്കാം. ശേഷിക്കുന്ന വിശദാംശങ്ങള്‍ ഇപ്പോഴും രഹസ്യമാണ്.
വരാനിരിക്കുന്ന റെഡ്മി 10 എ, റെഡ്മി 10 സി എന്നിവ യഥാക്രമം റെഡ്മി 9 എ, റെഡ്മി 9 സി എന്നിവയുടെ പരിഷ്‌കരിച്ച പതിപ്പായിരിക്കും. പുതിയ എന്‍ട്രി ലെവല്‍ സ്മാര്‍ട് ഫോണുകള്‍ക്ക് ഇന്ത്യയില്‍ 12,000 രൂപയില്‍ താഴെ ലഭിക്കുമെന്നാണ് പ്രതീക്ഷ. നിലവില്‍ റെഡ്മി 9 എ ഇന്ത്യയില്‍ 7,499 രൂപയ്ക്കാണ് വില്‍ക്കുന്നത്. ഇത് 2 ജിബി റാം + 32 ജിബി സ്റ്റോറേജ് അടിസ്ഥാന മോഡലിന്റെ വിലയാണ്. 3ജിബി + 32ജിബി സ്റ്റോറേജ് മോഡലിന് 8,299 രൂപയാണ് വില.
അതേസമയം, റെഡ്മി 10 എ, റെഡ്മി 10സി എന്നിവയുടെ ലോഞ്ച് ഷഓമി ഇതുവരെ സ്ഥിരീകരിച്ചിട്ടില്ലെന്നത് ശ്രദ്ധിക്കേണ്ടതാണ്. ഇതിനിടെ റെഡ്മി നോട്ട് 11എസ് ഫെബ്രുവരി 9 ന് ഇന്ത്യയില്‍ അവതരിപ്പിക്കാന്‍ ഒരുങ്ങുകയാണ്. ഈ ഹാന്‍ഡ്‌സെറ്റ് ക്വാഡ് റിയര്‍ ക്യാമറ സജ്ജീകരണത്തോടെയാണ് എത്തുന്നത്.
5ജിക്ക് പകരം 4ജി കണക്റ്റിവിറ്റി പിന്തുണയോടെ ഈ ഹാന്‍ഡ്‌സെറ്റ് വന്നേക്കുമെന്നാണ് സൂചന. ഇതിനു പുറമെ, ജനുവരി 26-ന് ആഗോള വിപണികളില്‍ റെഡ്മി നോട്ട് 11 സീരീസും കമ്പനി അവതരിപ്പിച്ചേക്കും. റെഡ്മി നോട്ട് 11 4ജി, റെഡ്മി നോട്ട് 11 5ജി, റെഡ്മി നോട്ട് 11 പ്രോ, റെഡ്മി നോട്ട് 11 പ്രോ+ എന്നിവയും ഈ ലൈനപ്പില്‍ ഉള്‍പ്പെട്ടേക്കാം.
