ദക്ഷിണാഫ്രിക്കയില് കണ്ടെത്തിയ ‘നിയോകോവ്’ എന്ന പുതിയ തരം കൊറോണ വൈറസ് അതിമാരകമാണെന്ന് ചൈനയിലെ വുഹാനില് നിന്നുള്ള ഗവേഷകര്. ഈ വൈറസിന് അതിവ്യാപന ശേഷിയാണെന്നും ആയിരങ്ങളുടെ മരണത്തിന് ഇടയാക്കുമെന്നും ഗവേഷകര് മുന്നറിയിപ്പു നല്കുന്നു.
ദക്ഷിണാഫ്രിക്കയിലെ ഒരു കൂട്ടം വവ്വാലുകളിലാണ് ‘നിയോകോവ്’ കണ്ടെത്തിയിരിക്കുന്നത്. ഇത് പുതിയ വൈറസല്ലെന്നാണ് റിപ്പോര്ട്ടില് പറയുന്നത്. സാര്സ് കോവ്-2വിനു സമാനമായി മനുഷ്യരില് കൊറോണ വൈറസ് ബാധയ്ക്ക് ഇതു കാരണമാകുമെന്നും വുഹാനിലെ ഗവേഷകരെ ഉദ്ധരിച്ച് റഷ്യന് വാര്ത്താ ഏജന്സിയായ സ്പുട്നിക് പുറത്തുവിട്ട വാര്ത്തയില് പറയുന്നു.
മെര്സ് കോവ് വൈറസുമായി ബന്ധമുള്ള ഇത് 2012ലും 2015ലും മധ്യപൂര്വേഷന് രാജ്യങ്ങളില് റിപ്പോര്ട്ട് ചെയ്തിരുന്നുവെന്നാണ് റിപ്പോര്ട്ടില് പറയുന്നത്. നിലവില് വവ്വാലുകളില് മാത്രമാണു വൈറസ് പടര്ന്നിരിക്കുന്നതെങ്കിലും നിയോകോവും അടുത്ത ബന്ധമുള്ള പിഡിഎഫ്-2180-കോവും മനുഷ്യരെ ബാധിക്കാമെന്നും പുതിയ പഠനങ്ങളില് കണ്ടെത്തിയിട്ടുണ്ട്. മനുഷ്യകോശങ്ങളിലേക്കു കടന്നുകയറാന് ഇതിനു വെറും ഒറ്റ രൂപാന്തരം കൂടി മാത്രം മതിയെന്നാണ് ഗവേഷകര് പറയുന്നത്.
കൊറോണ വൈറസിനേക്കാള് വിഭിന്നമായാവും ഈ വൈറസ് മനുഷ്യകോശങ്ങളെ ബാധിക്കുക. അതിനാല് നിയോകോവിനെ ചെറുക്കാന് മനുഷ്യശരീരത്തിലെ ആന്റിബോഡികള്ക്കോ നിലവിലെ വാക്സീന് സംരക്ഷണത്തിനോ കഴിയില്ലെന്നും ഗവേഷകര് ആശങ്ക പങ്കുവച്ചു. ഇതു ബാധിക്കുന്ന മൂന്നിലൊരാളും മരിക്കാനുള്ള സാധ്യതയും റിപ്പോര്ട്ടില് ചൂണ്ടിക്കാട്ടിയിട്ടുണ്ട്. വുഹാന് സര്വകലാശാലയിലെയും ചൈനീസ് അക്കാദമി ഓഫ് സയന്സസിലെയും ഗവേഷകരാണ് റിപ്പോര്ട്ട് പുറത്തുവിട്ടത്.