വെറും 4000 രൂപ ചെലവില്‍ കിടിലന്‍ ഫോട്ടോഷൂട്ടിനുള്ള അവസരമൊരുക്കി കെഎസ്ആര്‍ടിസി. ടിക്കറ്റിതര വരുമാനം വര്‍ധിപ്പിക്കാനുള്ള നടപടിയുടെ ഭാഗമായാണ് നിശ്ചിത കാലത്തേക്കുള്ള അടിപൊളി ഓഫറുമായി കെഎസ്ആര്‍ടിസി എത്തുന്നത്. സേവ് ദി ഡേറ്റുകളില്‍ ട്രെന്‍ഡ് ഒരുക്കാന്‍ നിശ്ചിത കാലത്തേക്കാണ് കെഎസ്ആര്‍ടിസി ഈ അവസരം ഒരുക്കിയിട്ടുള്ളത്.
ഇപ്പോള്‍ തന്നെ അവസരം മുതലാക്കുന്നവര്‍ക്ക് ഒരുപിടി നല്ല ഫോട്ടോകളുമായി സ്ഥലം വിടാം. 4000 രൂപ മുടക്കിയാല്‍ കെഎസ്ആര്‍ടിസിയുടെ ഡബിള്‍ ഡെക്കര്‍ ബസ് ഫോട്ടോഷൂട്ടിനായി വിട്ടുനല്‍കും. ഫോട്ടോഷൂട്ട് മാത്രമല്ല ഒപ്പം നഗരം കറങ്ങി വരാനുള്ള അവസരമാണ് ഇതിലൂടെ കെഎസ്ആര്‍ടിസി ഒരുക്കുന്നത്. ആദ്യ സേവ് ദി ഡേറ്റ് ഫോട്ടോഷൂട്ട് ജനുവരി 18 ന് വിവാഹം ഉറപ്പിച്ച ഗണേഷിന്റേതും ലക്ഷ്മിയുടേതുമായിരുന്നു.
വിന്റേജ് ഡബിള്‍ഡെക്കറിന്റെ പ്രൗഢിയില്‍ 50 കിലോമീറ്റര്‍ നഗരം ചുറ്റി, എട്ട് മണിക്കൂര്‍ നേരത്തേക്കാണ് കെഎസ്ആര്‍ടിസി വിട്ടുകൊടുക്കുക. വിവാഹ ശേഷമുള്ള ഫോട്ടോഷൂട്ടുകള്‍ക്കും ബര്‍ത്ത് ഡേ ഉള്‍പ്പെടെയുള്ള പാര്‍ട്ടികള്‍ക്കും ആനവണ്ടിയുടെ ഈ അഭിമാനതാരത്തെ വിട്ടുനല്‍കും. ഈ പ്രത്യേക ഓഫര്‍ ഡിസംബര്‍ വരെ മാത്രമേ നിലനില്‍ക്കൂ.
ബസിന്റെ രണ്ടാം നിലയില്‍ ആഘോഷങ്ങള്‍ക്കും താഴത്തെ നിലയില്‍ കുടുംബങ്ങളോടൊപ്പമുള്ള യാത്രക്കുമാണ് അവസരം. ലണ്ടനിലെ ആഫ്റ്റര്‍ നൂണ്‍ ടീ ബസ് ടൂറിന്റെ മാതൃകയില്‍ ആണ് പദ്ധതി. വിജയകരമാകുന്ന മുറയ്ക്ക് കൊച്ചിയിലും, കോഴിക്കോടും കെഎസ്ആര്‍ടിസി പദ്ധതി വ്യാപിക്കും.
