പ്രീമിയം ഇക്കോണമി ക്ലാസ് അവതരിപ്പിക്കുന്നതിനായി 30 വിമാനങ്ങള്‍ പാട്ടത്തിനെടുത്ത് എയര്‍ ഇന്ത്യ.
ഇരുപത്തിയൊന്ന് എയര്‍ബസ് എ 320 നിയോകളും നാല് എയര്‍ബസ് എ 321 നിയോകളും അഞ്ച് ബോയിംഗ് ബി 777-200 എല്‍ആര്‍ വിമാനങ്ങളും പാട്ടത്തിനെടുക്കുന്ന വിമാനങ്ങളില്‍ ഉള്‍പ്പെടുന്നുവെന്ന് എയര്‍ ഇന്ത്യ അറിയിച്ചു.2023-ഓടെ ആയിരിക്കും ഈ വിമാനങ്ങള്‍ എയര്‍ ഇന്ത്യയ്ക്ക് ലഭിക്കുക.ബിസിനസ് മോഡല്‍ മാറ്റി, യാത്രക്കാര്‍ക്കായി പ്രീമിയം ഇക്കോണമി ക്ലാസ് അവതരിപ്പിക്കാന്‍ ആണ് എയര്‍ ഇന്ത്യ ലക്ഷ്യമിട്ടിരിക്കുന്നത്. അതിനാല്‍ തന്നെ പുതുതായി വാടകയ്‌ക്കെടുക്കുന്ന എല്ലാ വിമാനങ്ങള്‍ക്കും പ്രീമിയം ഇക്കോണമി ക്ലാസ് ഉണ്ടായിരിക്കും.
എയര്‍ ഇന്ത്യയുടെ നിലവിലുള്ള വിമാനങ്ങളില്‍ ഇക്കണോമി ക്ലാസും ബിസിനസ് ക്ലാസും ഉണ്ട്. ബിസിനസ് മോഡല്‍ മാറ്റി എയര്‍ ഇന്ത്യ പ്രീമിയം ഇക്കോണമി ക്ലാസും നല്‍കും.ടാറ്റ ഗ്രൂപ്പിന്റെയും സിംഗപ്പൂര്‍ എയര്‍ലൈന്‍സിന്റെയും സംയുക്ത സംരംഭമായ വിസ്താര എയര്‍ലൈന്‍ വിമാനങ്ങളില്‍ പ്രീമിയം ഇക്കോണമി ക്ലാസ് ഉള്ള ഇന്ത്യയിലെ ഒരേയൊരു എയര്‍ലൈന്‍ ആണ്.വിമാനങ്ങള്‍ വാങ്ങുന്നതിനായി കഴിഞ്ഞ രണ്ട് മാസങ്ങളായി എയര്‍ബസുമായും ബോയിംഗുമായും ചര്‍ച്ചകള്‍ നടത്തിവരികയാണ് എയര്‍ ഇന്ത്യ. രണ്ട് കമ്പനികളിലെങ്കിലും പര്‍ച്ചേസ് ഓര്‍ഡര്‍ നല്‍കിയതിന് ശേഷം ഉടനെ തന്നെ പുതിയ വിമാനങ്ങളുടെ ഡെലിവറി ആരംഭിക്കുമെന്ന് പ്രതീക്ഷിക്കുന്നു. അതിനാല്‍ വാടക വിമാനങ്ങളുടെ സഹായത്തോടെ ഉടന്‍ വിപുലീകരണം നടത്താനാണ് എയര്‍ ഇന്ത്യയുടെ തീരുമാനം.
എയര്‍ ഇന്ത്യയുടെ നാരോ ബോഡി ഫ്ലീറ്റില്‍ 70 വിമാനങ്ങള്‍ ഉള്‍പ്പെടുന്നു, അതില്‍ 54 എണ്ണം സര്‍വീസ് നടത്തുന്നുണ്ട്. ഇതിന്റെ വൈഡ് ബോഡി ഫ്ലീറ്റില്‍ 43 വിമാനങ്ങളുണ്ട്, അതില്‍ 33 എണ്ണം പ്രവര്‍ത്തനക്ഷമമാണ്. നിലവിലുള്ള ബാക്കിയുള്ള നാരോ ബോഡി ഫ്ലീറ്റും വൈഡ് ബോഡി ഫ്ലീറ്റും 2023 ന്റെ തുടക്കത്തോടെ ക്രമേണ സേവനം ആരംഭിക്കും.വാടകയ്‌ക്കെടുത്ത വിമാനങ്ങള്‍ 2022 ഡിസംബറിനും 2023 മാര്‍ച്ചിനും ഇടയില്‍ എത്തുമെന്നും, ഇന്ത്യന്‍ മെട്രോ നഗരങ്ങളില്‍ നിന്നും യുഎസ്‌എയിലേക്കുള്ള റൂട്ടുകളില്‍ അവ സര്‍വീസ് ആരംഭിക്കുമെന്നും എയര്‍ലൈന്‍ അറിയിച്ചു.
ഇന്ത്യ-യുഎസ്, ഇന്ത്യ-കാനഡ റൂട്ടുകളില്‍ എയര്‍ ഇന്ത്യ വിമാനങ്ങള്‍ക്ക് വലിയ ഡിമാന്‍ഡാണ്, പ്രത്യേകിച്ചും 2020-ല്‍ കോവിഡ്-19 പൊട്ടിപ്പുറപ്പെട്ടതിനും ഈ വര്‍ഷം ഫെബ്രുവരിയില്‍ റഷ്യ-ഉക്രെയ്ന്‍ യുദ്ധത്തിനും ശേഷവും.രണ്ട് മാസം മുമ്പ് , എയര്‍ ഇന്ത്യ തങ്ങളുടെ വിപുലീകരണ പദ്ധതികള്‍ നടപ്പിലാക്കുന്നതിനാല്‍ പൈലറ്റുമാരുടെ വിരമിക്കല്‍ പ്രായം 58 ല്‍ നിന്ന് 65 ആയി ഉയര്‍ത്തിയിരുന്നു.
