മലയാള ചലച്ചിത്ര സംവിധായകൻ യതീന്ദ്രദാസ് അന്തരിച്ചു. 74 വയസായിരുന്നു. ന്യൂമോണിയ ബാധിതനായിരുന്നു. ചെന്നെെയിൽ നിന്ന് ഈ മാസം 22 നാണ് യതീന്ദ്രദാസ് തൃശൂരിലെത്തിയത്. തൃശൂർ ജൂബിലി മിഷൻ ആശുപത്രിയിൽ വച്ച് ഇന്ന് രാവിലെ ആയിരുന്നു അന്ത്യം.
സായികുമാർ കേന്ദ്രകഥാപാത്രത്തെ അവതരിപ്പിക്കുന്ന ഉൾക്കനൽ എന്ന സിനിമയുടെ ഡബ്ബിംഗ് അവസാനഘട്ടത്തിലെത്തിയിരിക്കെയാണ് രോഗം മൂർച്ഛിച്ചത്. ‘ഒടുവിൽ കിട്ടിയ വാർത്ത’, ‘ഓമനത്തിങ്കൾ’ എന്നീ സിനിമകൾ സംവിധാനം ചെയ്തു. വിൻസൻ്റ്, സേതുമാധവൻ, ബാലുമഹേന്ദ്ര, ബികെ പൊറ്റെക്കാട് തുടങ്ങിയ സംവിധായകരോടൊപ്പം നിരവധി കാലം സഹസംവിധായകനായിരുന്നു. സംസ്കാരം പാറമേക്കാവ് ശാന്തി ഘട്ടിൽ നാളെ നടക്കും.
