പുതിയ ടർബോചാർജ്‍ഡ് പെട്രോൾ എഞ്ചിനുമായി ഫ്രഞ്ച് വാഹനനിർമ്മാതാക്കളായ റെനോ. ഡസ്റ്റർ എസ്‌യുവിയിൽ ഉൾപ്പെടെ വിദേശത്ത് വിൽക്കുന്ന നിരവധി കാറുകളിൽ റെനോ വാഗ്ദാനം ചെയ്യുന്ന 1.3 ലിറ്റർ നാല് സിലിണ്ടർ SCe യൂണിറ്റിന്റെ ഡീട്യൂൺ ചെയ്‍ത 1.0 ലിറ്റർ മൂന്ന് സിലിണ്ടർ യൂണിറ്റായിരിക്കും ഈ പുതിയ പെട്രോൾ എഞ്ചിനെന്നും ആദ്യമിത് റെനോ ട്രൈബറിലാവും പരീക്ഷിക്കുകയെന്നുമാണ് റിപ്പോർട്ടുകൾ.
ഇന്ത്യ 2019 ഓഗസ്റ്റിലാണ് ട്രൈബറിനെ ഇന്ത്യൻ വിപണിയിൽ അവതരിപ്പിക്കുന്നത്. മികച്ച പ്രതികരണമാണ് വിപണിയിൽ ഈ വാഹനത്തിന്. നിലവിൽ പെട്രോൾ എൻജിൻ മാത്രമാണ് ട്രൈബറിലുള്ളത്‌. 72 ബിഎച്ച്പി പവറും 96 എൻഎം ടോർക്കുമേകുന്ന 1.0 ലിറ്റർ ത്രീ സിലിണ്ടർ പെട്രോൾ എൻജിനാണിത്. 5 സ്പീഡ് മാനുവൽ, 5 സ്പീഡ് എഎംടിയാണ് ട്രാൻസ്‍മിഷൻ. ടച്ച്സ്ക്രീൻ ഇൻഫോടൈൻമെൻറ് സിസ്റ്റം, ഡ്യുവൽ ടോൺ ഇന്റീരിയർ, റിയർ പാർക്കിങ് സെൻസറുകൾ, റിവേഴ്‍സ് ക്യാമറ തുടങ്ങിയവയും സുരക്ഷയ്ക്കായി ഡ്യുവൽ എയർബാഗ് കൂടാതെ സൈഡ് എയർബാഗുകളും സ്പീഡ് വാണിങ് സിസ്റ്റം തുടങ്ങിയവയും വാഹനത്തിലുണ്ട്.
മൂന്നാം നിരയിലെ നീക്കം ചെയ്യാവുന്ന സീറ്റുകൾ, മടക്കാവുന്ന മധ്യനിര സീറ്റുകൾ, മൂന്നാമത്തെ വരികൾക്കുള്ള പ്രത്യേക എസി വെന്റുകൾ, ആൻഡ്രോയിഡ് ഓട്ടോ ആപ്പിൾ കാർപ്ലേയ്ക്കൊപ്പം ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, GPS നാവിഗേഷൻ, പ്രൊജക്ടർ ഹെഡ്‌ലാമ്പുകൾ, പവർഡ് വിംഗ് മിററുകൾ എന്നിവയാണ് വാഹനത്തിന്റെ മറ്റ് പ്രധാന സവിശേഷതകൾ.
ട്രൈബറുൾപ്പെടെ നവംബർ മാസത്തെ വിൽപ്പനയിൽ 77 ശതമാനത്തിന്റെ വളർച്ചാണ് റെനോ നേടിയത്. കഴിഞ്ഞ വർഷം ഇതേകാലയളവിൽ 6134 വാഹനങ്ങളാണ് നിരത്തിലെത്തിച്ചതെങ്കിൽ 2019 നവംബറിൽ 10,882 വാഹനങ്ങൾ റെനോ നിരത്തിലെത്തിച്ചെന്നാണ് കണക്കുകൾ. ഇതോടെ ഇന്ത്യയിലെ അഞ്ചാമത്തെ വലിയ കാർ നിർമ്മാതാക്കളായും റെനോ മാറി.
എംപിവി ശ്രേണിയിൽ മാരുതി സുസുക്കി എർട്ടിഗയ്ക്ക് തൊട്ടുതാഴെയുള്ള സെഗ്‌മെന്റിലാണ് ട്രൈബറിന്റെ സ്ഥാനം. ലോഡ്‍ജിക്ക് ശേഷം റെനോ ഇന്ത്യയിലെത്തിക്കുന്ന രണ്ടാമത്തെ മൾട്ടി പർപ്പസ് വാഹനമാണിത്. സിഎംഎഫ്–എ പ്ലാറ്റ് ഫോമിൽ എത്തുന്ന വാഹനത്തിന് റെനോ ക്യാപ്ച്ചറുമായി ചെറിയ സാമ്യമുണ്ട്. ത്രീ സ്ലേറ്റ് ഗ്ലിൽ, സ്‌പോർട്ടി ബംബർ, റൂഫ് റെയിൽസ്, ഹെഡ്‌ലൈറ്റ്, ഡേ ടൈം റണ്ണിങ് ലൈറ്റ് എന്നിവയും വാഹനത്തെ വേറിട്ടതാക്കുന്നു. ഏഴ് പേർക്ക് വരെ യാത്ര ചെയ്യാവുന്ന ട്രൈബറിൽ കുറഞ്ഞ വിലയാണ് പ്രധാന പ്രത്യേകത. 4.95 ലക്ഷം രൂപ മുതലാണ് ഇന്ത്യയിൽ വാഹനത്തിന്റെ എക്‌സ്‌ഷോറൂം വില.
