പ്രസവശേഷം വരുന്ന സ്ട്രെച്ച് മാര്‍ക്കുകള്‍ സാധാരണമാണ്. മാത്രമല്ല, പല കാരണങ്ങള്‍കൊണ്ടും ശരീരത്തില്‍ സ്ട്രെച്ച് മാര്‍ക്ക് (Stretch marks) ഉണ്ടാകാം. പെട്ടെന്ന് തടികൂടുകയോ കുറയുകയോ ചെയ്യുമ്പോള്‍ ചര്‍മ്മത്തിലുണ്ടാകുന്ന (Skin) ചെറിയ വിടവുകളുടെ പാടുകളാണിത്.
ഓരോ മാസം കഴിയുന്തോറും വയര്‍ കൂടുതല്‍ വലുതാകുന്നത് മൂലമാണ് പ്രസവാനന്തര സ്ട്രെച്ച് മാര്‍ക്കുകള്‍ വരുന്നത്. ഇത് മിക്ക സ്ത്രീകളെയും അലട്ടുന്ന പ്രധാന പ്രശ്‌നങ്ങളിലൊന്നാണ്. ചിലരുടെയെങ്കിലും ആത്മവിശ്വാസത്തെ ഇത് ഇല്ലാതാക്കാം. സ്ട്രെച്ച് മാര്‍ക്ക് മാറ്റാന്‍ വീട്ടില്‍ തന്നെ ചെയ്യാവുന്ന ചില കാര്യങ്ങളുണ്ട്.
ചര്‍മ്മ പ്രശ്‌നങ്ങള്‍ക്കുളള ഉത്തമ പരിഹാരമാണ് കറ്റാര്‍വാഴ. ശരീരത്തിലുണ്ടാകുന്ന സ്ട്രെച്ച് മാര്‍ക്ക് മാറ്റാനും കറ്റാര്‍വാഴ സഹായിക്കും. ദിവസവും കറ്റാര്‍വാഴ നീര് പുരട്ടി നല്ലത് പോലെ മസാജ് ചെയ്യുന്നത് സ്ട്രെച്ച് മാര്‍ക്സിനെ ഇല്ലാതാക്കാന്‍ സഹായിക്കുന്നു.
ചര്‍മ്മത്തിലുണ്ടാകുന്ന പാടുകളെ അകറ്റാന്‍ മികച്ചതാണ് വെളിച്ചെണ്ണ. സ്ട്രെച്ച് മാര്‍ക്കുകളെ അകറ്റാനും വെളിച്ചെണ്ണ സഹായിക്കും. ഇതിനായി സ്ട്രെച്ച് മാര്‍ക്കുകളുള്ള ഭാഗത്ത് ദിവസവും വെളിച്ചെണ്ണ പുരട്ടാം.
സ്ട്രെച്ച് മാര്‍ക്സ് ഇല്ലാതാക്കാന്‍ അടുത്ത മികച്ചൊരു വഴിയാണ് ഒലീവ് ഓയില്‍ പുരട്ടുന്നത്. വിറ്റാമിന്‍ ഇ ധാരാളം അടങ്ങിയ ഇവ ചര്‍മ്മത്തിലെ പാടുകളെ നീക്കം ചെയ്യാന്‍ സഹായിക്കും.
സ്ട്രെച്ച് മാര്‍ക്കുകളുള്ള ഭാഗങ്ങളില്‍ അല്‍പ്പം ആവണക്കെണ്ണ ദിവസവും പുരട്ടാം. ആവണക്കെണ്ണയില്‍ അടങ്ങിയിരിക്കുന്ന ആന്റി ഓക്‌സിഡന്റുകളാണ് സ്ട്രെച്ച് മാര്‍ക്കുകളെ അകറ്റാന്‍ സഹായിക്കുന്നത്. കൂടാതെ ചര്‍മ്മത്തിന്റെ ‘ഇലാസ്റ്റിസിറ്റി’ നിലനിര്‍ത്താനും ചര്‍മ്മത്തിലുണ്ടാവുന്ന ചുളിവുകളെ തടയാനും ഇവയ്ക്ക് കഴിവുണ്ട്.
സ്ട്രെച്ച് മാര്‍ക്സ് ഇല്ലാതാക്കാന്‍ ഏറ്റവും മികച്ചതാണ് ചെറുനാരങ്ങ. സ്ട്രെച്ച് മാര്‍ക്കുകളുള്ള ഭാഗങ്ങളില്‍ അല്‍പം ചെറുനാരങ്ങാ നീര് സ്ഥിരമായി പുരട്ടുന്നത് പാടുകളെ ഇല്ലാതാക്കാന്‍ സഹായിക്കും.
ആല്‍മണ്ട് ഓയിലില്‍ അല്‍പം നാരങ്ങ നീര് മിക്സ് ചെയ്ത് സ്ട്രെച്ച് മാര്‍ക്സുള്ള ഭാഗത്ത് പുരട്ടുന്നത് നിറം മങ്ങി ചര്‍മ്മത്തിന് തിളക്കവും നല്‍കാന്‍ സഹായിക്കുന്നു. യാതൊരു വിധത്തിലുള്ള പാര്‍ശ്വഫലങ്ങളും ഇല്ല എന്ന് തന്നെ പറയാം.
ഷിയ ബട്ടറില്‍ ധാരാളം ആന്റി ഓക്സിഡന്റുകള്‍ അടങ്ങിയിട്ടുണ്ട്. ഇത് സ്ട്രെച്ച് മാര്‍ക്കുകള്‍ മാറ്റാന്‍ സഹായിക്കും. അതിനായി സ്ട്രെച്ച്മാര്‍ക്സുള്ള ഭാഗത്ത് ഷിയ ബട്ടര്‍ നന്നായി പുരട്ടാം. ശരീരത്തിലെ പാടുകള്‍ മാറ്റാന്‍ ഏറ്റവും നല്ലതാണ് തേന്‍. സ്ട്രെച്ച് മാര്‍ക്സുള്ള ഭാഗത്ത് തേന്‍ പുരട്ടി, മസാജ് ചെയ്യുന്നത് ഇവയെ അകറ്റാന്‍ സഹായിക്കും.
മുട്ടയുടെ വെള്ളയും സ്ട്രെച്ച് മാര്‍ക്സിന് നല്ലൊരു പരിഹാരമാണ്. സ്ട്രെച്ച്മാര്‍ക്സ് ഉള്ള ഭാഗത്ത് മുട്ടയുടെ വെള്ള പുരട്ടാം. ആഴ്ചയില്‍ മൂന്ന് ദിവസം വരെയൊക്കെ ഇങ്ങനെ ചെയ്യാം. ഉരുളക്കിഴങ്ങ് നീര് ആണ് അടുത്തതായി ഈ പട്ടികയില്‍ ഉള്‍പ്പെടുന്നത്. ഇവ ചര്‍മ്മത്തിലെ ഇരുണ്ട വൃത്തങ്ങള്‍, മറ്റ് പാടുകള്‍ എന്നിവ അകറ്റാന്‍ സഹായിക്കും. സ്ട്രെച്ച്മാര്‍ക്സ് ഉള്ള ഭാഗത്ത് ഉരുളക്കിഴങ്ങ് നീര് പുരട്ടിയാല്‍ മാത്രം മതി. ആഴ്ചയില്‍ മൂന്ന് മുതല്‍ നാല് ദിവസം വരെ ഇത് തുടരാം.
